CEBU CITY, Philippines – Mitingog na ang inahan sa influencer nga si Zeinab Harake nga si Mariafe Ocampo kabahin sa iyahang pagka-absent sa engrandeng kasal sa anak niadtong Hunyo 1 sa Tagaytay.
Sukad sa pag-upload sa vlog ni Zeinab sa ilang kasal sa iyang bana nga si Bobby Ray Parks Jr., daghan na ang natingala nganu wala makita ang iyahang inahan sa mga video o mga hulagway.
Daghan ang nangutana kung asa ang inahan ni Zeinab, kay makita sa video nga ang mga igsuon ra ug ang amahan ra niya ang mitunol niya paingon sa altar ngadto kang Ray.
Paglabay sa pila ka adlaw nga mga pangutana gikan sa mga netizen, wala na mapugngi ni Mariafe ug kini misulti na gyud sa iyahang habig pinaagi sa social media.
READ: Ray Parks Jr. ties knot with Zeinab Harake
Sa usa ka comment nga karon kay nag-viral na sa social media, niingon si Mariafe:
“Ano po ang gagawin ko, di po ako pinapasok sa gate. Naka-ban po ako. Mahigpit na bilin ni Zeinab sa mga coordinator po then sa headguard,” sigon ni Mariafe.
“Kaya uwi na lang po ako. Ano gagawin ko pilitin ‘yung guard nakipag-usap na nga po di po talaga papasukin mother ni Zeinab. Yun po utos ni Zeinab sa kanila. Okey na po ba?,” dungag sa inahan.
Kahinumduman nga miingon usab ang usa ka netizen nga nakakita sa inahan ni Zeinab sa usa ka convenience store. Didto niya nadunggan nga wala siya pasudla sa kasal.
Sa sinugdanan, wala pa siya kasiguro kung mao ba gyud to ang inahan ni Zeinab, apan pag-check niya pag-uli, nakumpirma nga si Mariafe gyud ang iyang nakita.
Nag-post sab siya sa iyang Facebook og litrato nga gikan sa usa ka kan-anan nga naka formal attire si Mariafe. Makita sab didto ang uban niyang kauban lakip sila Cong TV ug Viy Cortez nga misalmot sa kasal.
Base sa caption, nakuha ang mga hulagway niadtong Hunyo 1—ang adlaw mismo sa kasal ni Zeinab.
Kahinumduman usab nga mi-komento ang manager ni Zeinab nga si Jhay Isidro nga ang rason sa pagkawala sa inahan sa kasal mao nga “not feeling well” daw kini, nga supak sa pamahayag ni Mariafe.
Hangtod karon, wala pa gihapoy pamahayag gikan sa kampo ni Zeinab kabahin sa isyu. /csl